எஸ்.பி.வேலுமணியும் நயினார் நாகேந்திரனும் சந்தித்து பேசியுள்ளது கவனம் பெற்று வருகிறது.

பாஜக சட்டமன்றக் குழு தலைவர் நயினார் நாகேந்திரன் அதிருப்தியில் இருப்பதாகவும் அவர் கட்சி மாறும் மனநிலையில் உள்ளதாகவும் தகவல்கள் வெளியாகின.

நேற்று திருநெல்வேலி சென்ற அதிமுக முன்னாள் அமைச்சர் எஸ்.பி.வேலுமணி நயினார் நாகேந்திரனை அவரது வீட்டிற்கே சென்று சந்தித்து பேசியுள்ளது அரசியல் பரபரப்பை ஏற்படுத்தியுள்ளது. அந்த சந்திப்பின் போது நயினார் நாகேந்திரன் அதிமுக கரைவேட்டியை பொன்னாடையாக வேலுமணிக்கு அணிவித்து வரவேற்றார்.

தமிழகத்தின் தற்போது உள்ள அரசியல் சூழலில் எதிரும் புதிருமாக உள்ள கட்சிகளாக அதிமுகவும் பாஜகவும் இருந்து வருகிறது. இரு கட்சிகளின் அரசியல் தலைவர்களும் ஒருவருக்கு ஒருவர் சரமாரியாக தங்களது கருத்துக்களை எதிரும் புதிருமாக பகிர்ந்து வருகின்றனர். இந்த நிலையில் நெல்லையில் நடந்த அதிமுக கள ஆய்வுக்கூட்டத்திற்கு வருகை தந்த முன்னாள் அமைச்சரும் அதிமுக தலைமை நிலைய செயலாளருமான எஸ்.பி வேலுமணி கூட்டத்திற்கு பின் நெல்லை சட்டமன்ற உறுப்பினரும் பாஜகவின் சட்டமன்ற குழு தலைவருமான நயினார் நாகேந்திரன் இல்லத்திற்கு சென்றார்.

இந்த சந்திப்பில் முன்னால் அமைச்சர் வேலுமணியின் இல்ல விழாவிற்கான அழைப்பிதழ் வழங்கப்பட்டதாக கூறப்படுகிறது. எதிரும் புதிருமான கட்சிகளின் தலைவர்களாக இருந்தாலும் அதிமுகவில் இருக்கும் போது இருவரும் நன்கு பழகியவர்கள் என்பது குறிப்பிடத்தக்கது.