எடப்பாடி பழனிசாமிக்கு வேறு வேலை இல்லை என்பதால் தினமும் அறிக்கை வெளியிடுவதாக அமைச்சர் சேகர்பாபு விமர்சனம் செய்துள்ளார்.

சென்னையில் செய்தியாளர்களிடம் பேசிய அமைச்சர் சேகர்பாபு, “மக்களுக்கு துன்பம் ஏற்படாமல் பாதுகாக்கவும், அனைத்து அத்தியாவசிய பொருட்களும் கிடைப்பதற்கு முதல்வர் மு.க.ஸ்டாலின், துணை முதல்வர் உதயநிதியும் களத்தில் நின்று களமாடி வருகின்றனர். களத்தில் ஆட்சியும் கட்சியும் ஒருங்கிணைந்து கைகோர்த்து பெருமழை வெள்ளத்தை சமாளிப்போம். மக்கள் துயரை துடைப்போம்” என்று தெரிவித்தார்.
உதயநிதி பிறந்தநாளை விமரிசையாக கொண்டாடுகிறார்கள் என எடப்பாடி பழனிசாமி விமர்சனம் செய்துள்ளாரே என்ற கேள்விக்கு, “தனது பிறந்தநாளுக்கு விளம்பர பதாகைகள் வேண்டாம், ஆடம்பரம் வேண்டாம், ஏழை எளிய மக்கள் மற்றும் திருநங்கைகளுக்கு நலத் திட்ட உதவிகள் வழங்க வேண்டும் என்று உதயநிதி ஸ்டாலின் அறிவித்து இருந்தார்.

பார்ப்பவர்கள் கண்ணில் கோளாறு என்றால் யார் என்ன செய்ய முடியும். காமாலை கண்களுக்கு கண்டதெல்லாம் மஞ்சளாகவே தெரியும். எங்கள் தலைவர் மு.க.ஸ்டாலின் பாணியில் சொல்ல வேண்டும் என்றால் எடப்பாடி பழனிசாமிக்கு வேறு வேலை இல்லை. அதனால் இப்படி அறிக்கை விட்டுக்கொண்டு இருக்கிறார்” என்று விமர்சனம் செய்தார்.

மேலும், “22 வயதில் மிசா சட்டத்தில் சிறைக்கு சென்றவர். 60 ஆண்டுகால பொது வாழ்வுக்கு சொந்தக்காரர். தமிழகம் முழுவதும் தன் கால் படாத இடமே இல்லை என்ற அளவுக்கு மக்கள் துயர் துடைப்பவர் முதல்வர் மு.க.ஸ்டாலின். அதனால் தான் சிறந்த 10 முதல்வர்களில் அவரையும் தேர்வு செய்துள்ளது ஊடகங்கள். ஆனால், ராமதாஸ் எந்த ஊரில் இருக்கிறார் என்று தெரியவில்லை” என்றும் பதிலடி கொடுத்தார்.